Ginakasubo sang Capiz Police Provincial Office (CPPO) ang pagpatay kay Police Captain Rian Ampoyos, myembro sang First Capiz Provincial Mobile Force Company, matapos ini ginluthang sa Barangay Binuntucan, Pontevedra, Capiz.
Sa interview sang Bombo Radyo kay Police Major Rachelle Garnica, Public Information Officer sang CPPO, iya ginpahayag nga nagapalab-ot gid sila sang pagpakig-unong sa pamilya sang nagtaliwan nga pulis.
Ginapasalig sang CPPO pinaagi sa liderato ni Police Col. David Cachumbo Jr., ang Officer-In-Charge sang talatapan, nga himuon ang tanan nga legal nga tikang agud mahatag ang hustisya sa pamilya ni Capt. Ampoyos.
Nagpangabay man ang natungdan sa publiko nga kun may yara sang nahibaloan sa nahamtangan sang duha pa ka mga suspek, i-report gilayon sa kapulisan.
