ROXAS CITY, CAPIZ – Mapahamtang sang police assistance desks ang Capiz Police Provincial Office sa guwa sang mga eskwelahan sa probinsya para sa nagahilapit nga pagbukas sang klase sa Hunyo 16, 2025.
Sa interview sang Bombo Radyo kay PCapt. Merry Chris Dela Cruz, Spokesperson sang Capiz Police Provincial Office, iya ginpahayag nga ang mga kapulisan amo ang maga-respond sa safety concerns kag magahatag sang gilayon nga bulig sa mga buluthuan.
Suno kay PCapt. Dela Cruz, posible tag duha ka mga pulis ang ibutang sa guwa sang mga eskwelahan kag may yara man sang foot kag mobile patrols nga magalibot sa lugar agud malikawan ang krimen amo man ang paghatag gilayon sang tikang sa posible insidente nga matabo.
Pahayag niya, magabulig man sa pagpabilin nga safe ang mga estudyante, manunudlo kag ginikanan amo ang mga force multiplier.
Nagpanawagan man ang kapulisan sa mga ginikanan nga indi pagpadal-on sang motorsiklo ang mga kabataan ilabi na kun wala sang mga dokumento, lisensya kag helmet ang mga ini bangud delikado kag mabutang sa peligro ang ila kabuhi amo man ang mga motorista nga ila masumalang.
