Ginasiguro sang Capiz Police Provincial Office nga may yara sang bastante nga kapulisan sa palibot sang Roxas City kadungan sang pag-umpisa sang National Festival of Talents.
Sa interview sang Bombo Radyo kay Police Col. Albert Tapulao Jr., Provincial Director sang CPPO, iya ginpahayag nga may yara sang mga gin-deploy nga mga pulis sa 19 ka mga billeting areas.
Suno kay Tapulao, may yara sang kabug-osan nga 1,400 nga mga kapulisan ang naka-deploy para sa Capiztahan 2026 lakip na ang sa National Festival of Talents.
Ginapabugal man sang Provincial Director ang ila nga proyekto nga pagpahamtang sang closed circuit television (CCTV) camera sa mga strategic areas kag makit-an ang footage sa ila mismo nga command center kag bisan sa telepono sini makit-an niya ang hulag sang publiko.
Magluwas sa mga kapulisan, makabulig man sa pagpabilin sang kalinong kag katawhay sang paghiwat sang National Festival of Talents amo ang Barangay Peacekeeping Action Team (BPAT) kag tanods.
Nahibaluan nga bwas, Abril 19, hiwaton ang opening program sa Dinggoy Roxas Civic Center, alas 3 sang hapon sa diin ginalauman nga pangunahan ini ni Department of Education Secretary Sonny Angara.
