Nagpahanumdom sa publiko ang Capiz Police Provincial (CPPO) nga maghalong sa nagadamunga kaso sang robbery-holdap sa probinsya sang Capiz.
Sa interview sang Bombo Radyo kay Police Captain Merry Chris Dela Cruz, Public Infomation Officer sang Capiz Police Provincial (CPPO), iya ginpahayag nga sang nagligad nga mga bulan, asud-asud nga kaso sang robbery-holdap ang nagluntad sa nagkalain-lain nga banwa sa probinsya kun sa diin ang mga delivery rider kag collector ang mga biktima.
Suno pa kay Police Captain Dela Cruz, ginalantaw nga posible isa lang ang may kahimuan sang amo nga pagpangawat nga nagluntad.
Pahayag pa niya, pagabutangan sang sticker nga may mga numero ang mga motorsiklo agud nga madasig sila nga makapakig-angut sa tion nga mabutang sila sa indi manami nga sitwasyon.
Nagpanawagan man ang natungdan nga mangin aligmat sa palibot, bantayan ang mga gamit agud nga malikawan ang pagpangawat ilabi na nga nagadugok ang tawo sa nagahilapit nga paskwa.
