ROXAS CITY – Natigayon nga madakpan ang 10 ka wanted person kag 3 ka suspetsado sa iligal nga droga sang katapo sang Police Provincial Office (PPO) – Capiz, pina-agi sa ginpatigayon nga weeklong simultaneous anti-criminality and law enforcement operations dubbed nga “Birada Semana” sumugod Hunyo 20 tubtob 26, 2022 kag pina-agi man sa pwersa sang Capiz PDEU, Roxas City SDET kag Ivisan SDET.
Mahibaluan nga nagpatigayon ang CPPO sang 10 ka operasyon batuk sa mga nasambit nga mga nagkaladakpan.
Sa nasambit nga numero 2 diri ang Most Wanted Persons (MWP) kag na-aresto sa syudad sang Roxas kag Ivisan Capiz, samtang 8 naman ang Other Wanted Persons (OWP) nga nadakpan sa Cuartero-1, Dumarao-2, Mambusao-2, Pilar -1, Pontevedra-1, kag sa Sigma-1, Capiz.
Kapin 57.521 gramos naman ang bug-at sang ginapatihan shabu nga nakumpiskar sang mga kapulisan kag may street value nga 394.542.80.
Samtang tatlo naman ang nadakpan sang indi lisensyado nga armas luthang sa banwa sang Jamindan kag anum ang na-aresto sa syudad sang Roxas, bangud sa ilegal nga pagbulang kag isa sa Dumalag bangud naman sa ilegal nga pagsugal.
Dugang diri, naglab-ot naman sa 8 ang nagkaladakpan bangud sa ilegal nga pagpangisda kag nakumpiskar diri ang 2 ka sakayan pandagat sa probinsya.
Naglab-ot naman sa 28 ka mga armas luthang kag 1 ka bomba ang ginsungka sa mga kapulisan, kag mahibaluan isa ka katapo sang rebelde ang nagsungka sa Provincial Mobile Force Company sa amu nga operasyon.
Matandaan nga ang “Birada Semana’ isa sa mga tikang sang katapo sang mga kapulisan agud pasangkaron ang pagpangampanya batuk sa mga nagkalain-lain nga mga krimen nga nagakahinabo sa probinsya.
Nahibaluan nga ang “Birada Semana” ang isa sa mga lihok sang PNP agud ilabi pa nga mapasangkad ang kampanya batuk sa tanan nga sahi sang krimen kag pagdakop sa mga nagalapas sa kasuguan.
Bangud diri, gindayaw ni Provincial Director, Police Colonel Winston M De Belen, ang katapo sang kapulisan bangud sa ila nga dedikasyon kag pagtimakas agud mapatigayon ang pagkadakop sa mga nagkaladakpan sa nasambit nga operasyon.
