Ginhanduraw kag ginpasidunggan sang mga miyembro sang Capiz Post-War Veterans ang mga Pilipino kag Amerikano nga soldado nga kabahin sang ‘Bataan Death March’ subong nga adlaw Abril 9, sa pagselebrar sang ‘Araw ng Kagitingan’.
Sa interview sang Bombo Radyo kay Veteran Eduardo A. Betito Sr., President sang Veterans Federation of the Philippines Capiz Chapter, iya ginpahayag nga apisar nga sila ang post-war veterans lamang, nahibaluan gid nila nga ang amo nga sapilitan nga paglakat sang mga soldado sa Bataan, isa gid ka mapintas nga hitabo sa kasaysayan sang pungsod.
Suno kay Betito, may yara sang duha ka sahi ang Veterans, sa diin amo ang World War II Veterans nga amo gid ang nagsabak sa death march kag ang post-war veterans sa diin nga isa sya sa miyembro diri.
Pahayag niya, nagakadapat nga ikomemorar ang amo nga soldado bangud sila ang nangin instrument agud nga mangin hilway ang pungsod halin sa gahom sang mga Hapon.
Nahibaluan nga Araw ng Kagitingan ginaselebrar bilang paghanduraw sa Bataan Death March sang Abril 9, 1942, kun sa diin mas ukon menos 76,000 ka mga Pilipino kag Amerikano nga soldado ang nagsurrender kag linibo ang napatay bangud sa gutom, kauhaw, kag abuso sang mga Hapon padulong sa Camp O’Donnell sa Capas, Tarlac.
Nagalaum naman ang natungdan nga kuntani indi ini malipatan sang mga bag-ong tubo apisar nga nangin modern na ang kalibutan.
