ROXAS CITY – Ginpasiguro sang pamunuan sang Capiz Police Provincial Office (CPPO) nga samtang nagaserbi nga mga frontliners sang coronavirus disease (COVID-19) pandemic ang mga kapulisan, nakaalerto man ang mga ini agud malikawan ang pagluntad sang mga krimen kapareho sang pagpangawat.
Ini ang ginpahayag ni (CPPO) Provincial Director Police Colonel Julio Gustilo Jr. kasunod sang natabo nga insidente sang pagpangawat sa Barangay Dayao, Roxas City kun sa diin nakatuad mismo ang kawatan nga nahimo niya lamang ang krimen bangud sa gutom nga resulta sang enhanced community quarantine.
Suno kay Gustilo, ginpanugyanan sini ang mga chiefs of police sa mga Municipal Police Stations nga siguruhon nga indi nila mapabay-an ang seguridad sa ila tagsa ka mga lugar samtang masako bilang frontliners ang mga kapulisan.
Ginpahayag sini nga nagpanugyan man siya sa mga hepe sa kabanwahanan nga magpakig-angut sa mga punong barangay sa ila banwa agud makabulig ang mga miyembro sang Barangay Peacekeeping Action Team (BPAT).
Nagpanugyan man ini sa publiko nga magpabilin nga nakaalerto kag indi paghatagan sang kahigayunan ang mga kriminal nga makahimo sang anuman nga krimen.
Nagpangabay ini sa publiko nga tinguhaon nga nasaraduhan ang ila tagsa ka mga balay ilabi na kun gab-i agud malikawan ang mga kawatan.
