Natumod na ang duha sa apat nga ginapahayag mga suspek sa robbery hold-up nga nagluntad sa National Highway nga sakop sang Barangay Sta. Fe, Pilar, Capiz.
Sa interview sang Bombo Radyo kay PCOL Albert Tapulao, ginpahayag sini nga “identified” ukon natumod na ang ginaalegar duha sa apat nga mga suspek sa amo nga insidente kun sa diin tatlo sa mga ini ang lalaki kag isa ka babaye.
Dugang pa sini, nakit-an na ang salakyan nga ginsakyan sang mga suspek sa pagpang-hold-up sa Dingle, Iloilo.
Matandaan nga ginkilala ang mga biktima nga sanday Jorge Valsote Ulega, 48-anyos kag residente sang Brgy. Pob. Tabuc, Panay, Daniel Acervo Lava, 35-anyos kag residente sang Brgy. Parian, Sigma, kag Jose Billones, 57-anyos kag residente sang Brgy. Tanza Sur, Panay nga lunsay nagaubra sa isa ka kumpanya sang softdrinks.
Nahibaluan nga yara sa kapin ₱4.5M ang balor sang mga nataban sang mga suspek kun sa diin ginakalakipan ini sang cash nga ₱3.1M, tatlo ka cheke nga nagabalor sa kapin ₱1M, kag ang salakyan ang tatlo ka mga biktima.
Sa karon, padayon naman ang maid-id nga imbestigasyon sang mga kapulisan angut sa nagluntad nga insidente.
