ROXAS CITY – Wala na sang may nabaton nga report ang Capiz Police Provincial Office (CPPO) nga may yara sang naga-eksister nga illegal gambling sa probinsya sang Capiz.
Ini ang ginpahayag ni CPPO Provincial Director, Police Colonel Julio Gustilo Jr. sang ma-interview sang Bombo Radyo Roxas.
Suno kay Gustilo nga hugot ang ginapatigayon nga kampanya sang mga kapulisan kontra sa ilegal nga sugal matapos nga may yara sang apat ka mga indibidwal nga nadakpan nga nagapataya sang illegal numbers game sa pila ka mga kabanwahanan sa probinsya sang Capiz.
Bangud diri, nag-untat na ang pila ka mga indibidwal nga nagapataya sang STL sa rason nga wala pa sang may naga-ekister nga STL sa probinsya.
Ginpahayag ni Gustilo nga ginasunod lamang sang kapulisan kun ano ang yara sa laye sandig sa Presidential Decree 1602.
Magluwas sa illegal numbers game padayon naman nga ginamonitor sang mga kapulisan ang mga iligal nga pabulang sa mga kabaranggayan rason nga may yara sang may nadakpan nga kapin sa 19 ka mga indibidwal sa duha ka mga banwa sa probinsiya.
Ginapanindugan ni Gustilo nga wala sang legal nga pabulang sa guwa sang lisensiyado nga cockpit arena.
Ila man nga ginatsekyar ang mga bilasyunan nga may yara sang iligal nga pasugal.
Gindugang ni Gustilo nga wala sang may ginapilio ang layi kun sa diin basta may yara sang kwarta nga ginakaulamiran makabig ini nga illegal.
