ROXAS CITY – Wala sang kinamatarong si Police Senior Master Sgt. Jonel Nuezca nga luthangon patay ang mag-iloy nga Gregorio sa Paniqui, Tarlac.
Ini ang ginpahayag ni Police Colonel Julio T. Gustillo Jr., provincial director sang Capiz Police Provincial Office sang mainterview sang Bombo Radyo.
Suno kay Gustillo nga sala ang ginhimo ni Nuezca sa mag-iloy nga biktima nga sanday Sonya Gregorio, 52-anyos nga amo ang iloy kag anak sini nga si Frank Anthony Gregorio, 25-anyos, residente sang Barangay Cabayaoasan, Paniqui, Tarlac.
Ginpahayag sini nga kun kaisa indi mapaktan ang utok ukon kondisyon sang paminsaron sang isa ka pulis ilabi na nga may yara ini sang ginasukbit nga armas luthang depende sa nagakahinabo sa iya palibot.
Apang may kaangtanan sa nasambit nga krimen, wala man sang pamahog sa sitwasyon sa kabuhi sini para nga magpanginit kag magpatay sang wala sang ikasarang kag inosente nga mga tawo.
Bangud diri, nagpanugyan si Gustillo nga bag-o mag-obra sang tikang, paminsaron gid anay ang resulta.
Matandaan nga nag-viral ang video sang mga biktima kaupod ang suspek kag ang iya anak nga menor de edad samtang nagabaisay tubtub ginpatay sang pulis ang mag-iloy.
Magluwas diri, nasaksihan pa sini ang natabo nga mahimo tunaan sang pagkatrauma sini hasta magdako.
Samtang, nagalaom naman si Gustillo nga indi na ini masulit ang natabo nga insidente sa diin imbolbado ang hanay sang pulisya partikular na diri sa probinsya.
Nagpasalig naman ini sa mga pumuluyo nga padayon sa gihapon ang kampanya sang mga kapulisan pinaagi sa pagpabilin sang kalinong kag katwhay subongman ang mga programa sa hanay sang pulisya.
