ROXAS CITY – Ginklaro sang Presidente sang Capiz Provincial Bantay Dagat, nga wala sila naga-istrikto sa pagpangdakop sa mga mangingisda apang naga-istrikto lamang sila sa mga grupo nga nagapatigayon sang illegal nga pagpangisda sa kadagatan nga sakop sang probinsya.
Sa interview sang Bombo Radyo kay Mr. Radin Billoned Capiz Provincial Bantay Dagat President, ginpahayag sini nga kun ila pabay-an ang boundary sang probinsya diri nagasulod ang mga illegal nga mangingisda kun sa diin nagakuha sang madamo nga mga isda.
Suno kay Billoned, nagahatag man sila sang konsiderasyon sa mga mangingisda kun may mga nagakaigo nga dokumento nga ipresentar sa ila.
Apang ginahinyo lamang sini sa mga dalagko nga sakayan nga indi tuman magpahigad bangud makaluluoy ang mga magagmay nga fisher folks.
Ginklaro man ni Billoned nga hugot nila nga gina-istriktuhan ang mga dalagko nga trawl nga nagasulod sa municipal waters sang probinsya.
Mahibaluan nga base sa ila datos, may yara na sang 17 nga kaso sang trawl ang ila na-file sa Region VI Bureau of Fisheries and Aquatic Resources (BFAR) sa probinsya sang Iloilo kun sa diin naglab-ot sa mas o menus P1.7-M nga penalidad ang ila natipon.
Ang nasambit nga balor ang magakadto sa region kag national kun sa diin 50% diri ang magakadto sa probinsya partikular sa mga fisher folks sa banwa sang Pilar ukon mga lugar nga kutob nadakpan ang mga illegal nga nagpangisda.
Mensahe sini sa mga nagapadayon sa paghimo sang illegal nga aktibidad, agud indi maapektuhan ang ila pagpaninguha mas maayo nga untaton na lamang nila ang kaangay sini nga buluhaton.
