Gin-aprubahan sang Capiz Provincial Board ang isa ka resolusyon para sa pag-install sang Solar LED street lights sa pila ka mga tourist destination sa probinsya sang Capiz.
( YAP)
Sa interview sang Bombo Radyo kay Dr. Cesar Yap Jr., Chairman sang Tourism Committee, iya ginpahayag nga ang nasambit nga resolusyon ang may yara sang budget nga P100 million nga magahalin sa Tourism Infrastructure and Enterprise Zone Authority (TIEZA).
Suno kay Yap, sa first district, plano nga magbutang sang 230 ka solar LED streetlights halin Roxas Airport pakadto sa pila ka mga barangay sa Pontevedra kag Panay samtang 455 ka solar LED streetlights naman ang igabutang sa banwa sang Dao, Cuartero kag Dumalag.
Pahayag pa niya, tinutuyo sang nasambit nga resolusyon ang pagpasangkad sang seguridad, visibility, kag overall experience sang mga turista ilabi na sa gab-i.
Ginpasiguro man sang natungdan nga padayon ang mga proyekto sang Capiz Provincial Board para sa ikaayo sang tanan nga sektor kag pumuluyo sa probinsya sang Capiz.
