ROXAS CITY – Magapatigayon sang maid-id nga imbestigasyon ang Sangguniang Panlalawigan sang probinsiya sang Capiz natuhoy sa natabo nga pagkamatay sang apat ka mga pasyente sa Intensive Care Unit (ICU) sa Roxas Memorial Provincial Hospital sa sulod lamang sang isa ka adlaw sadtong nakaligad nga Disyembre 25, 2019.
Ini ang ginpahayag ni Vice-Governor Jaime ‘Mitang’ Magbanua sang mainterview sang Bombo Radyo.
Suno kay Magbanua nga ila nakasugtan sa konseho nga i-refer sa Committee of the Whole ang pagtuon sa nasambit nga isyu.
Ginpahayag sini nga mayorya sa mga miyembro sang konseho ang nagapabor nga dapat nga imbestigahan ang natabo agud mahibaluan kun ano ang matuod nga rason sang kamatayon sang nasambit nga mga pasyente.
Indi man mapat-od ni Magbanua kun matuod nga ang wala gilayon mapaandar nga generator set ang rason sang kamatayon sang mga pasyente sa ICU bangud suno diri dapat nga pamatian ang magtimbang nga bahin agud mahibaluan ang kamatuoran.
Matapos ang ila nga imbestigasyon suno kay Magbanua, ila man nga solusyunan kun ano ang makit-an nila nga nangin problema agud indi na masulit pa ang nasambit nga hitabo.
Samtang gintawag naman sang bise-gobernador nga ‘irresponsible statement’ ang ginbuy-an nga pahayag ni Provincial Administrator Edwin Monares nga madamo gid man ang nagakalamatay sa ospital.
Wala nauyunan ni Magbanua ang pahayag ni Monares bangud suno sa iya nagakadapat nga may yara kita sang ‘empathy’ sa aton nga isigkapareho.
