Nagpaguwa sang resolusyon ang Provincial Board para tanan nga lokal nga panguluhan, rescue teams kag emergency response agencies sa probinsya sang Capiz nga magbakal sang Portable AMBUBAG ukon Bag-Valve-Mask devices para Basic Life Support kag CPR capabilities para sa mga kaso sang pagkalumos kag cardiopulmonary emergencies.
Sa interview kay Board Member Dr. Cesar Yap, iya ginpahayag nga daku ang kinahanglanon sang amo nga kagamitan bangud madamo nga lugar sa Capiz ang nalibutan sang suba, baybayon kag dagat nga posible matabuan sang drowning incidents.
Suno kay Yap, importante nga may yara sang Portable AMBUBAG ang mga rescue responders bangud indi lamang chest compressions ang kinahanglan sa pagluwas sang biktima kundi pati man ang paghatag sang insakto nga ventilation kag oxygen support.
Pahayag pa niya, apisar may yara na sang Automated External Defibrillator ang iban nga rescue units, kulang naman sa kagamitan para sa artificial ventilation nga isa man ka importante nga bahin sang emergency response.
Dugang pa sang natungdan, ang pagpreserbar sang kabuhi sa tion sang emerhensya nagakinahanglan sang igo nga kagamitan kag insakto nga training, gani importante nga mangin prayoridad ini sang tanan nga concerned agencies sa Capiz.
