Tinutuyo sang Capiz provincial government nga mapabilin ang probinsya bilang Seafood Capital of the Philippines paagi sa pagpalig-on sang industriya sang palangisdaan kag paghatag sang suporta sa mga local nga mangingisda.
Sa interview sang Bombo Radyo kay Ramie Lyn G. Bañares, Acting Chief sang Fisheries Division sang Provincial Agriculturist Office, iya ginpahayag nga prayoridad sang Capiz provincial government ang pagpauswag sang fisheries sector sa probinsya.
Suno kay Bañares, isa sa mga problema nga ila ginapangatubang amo ang pagnubo sang lebel sang tubig sa pila ka katubigan bangud sang epekto sang Super El Niño.
Dugang pa sini, padayon ang ila nga pagpatuman sang mga tikang batok ang epekto sang El Niño, lakip na ang kada bulan nga pagmonitor sa red tide.
Ini agud nga masiguro nga may bastante nga suplay sang mga produkto sang dagat kag mapasangkad ang pangabuhian sang mga mangingisda sa probinsya.
