Mapatuman man sang Compressed Four-Day Work Week, sandig sa Memorandum Order No. 45, Series of 2026 nga ginpagwa ni Governor Fredenil H. Castro.
Sa interview sang Bombo Radyo kay Atty. Luvim Amores, Provincial Information Officer kag Concurrent Human Resource Management Officers, iya ginpahayag nga ang opisina sang gobyerno magabukas halin Lunes tubtob Huwebes, halin alas 7:30 sang aga tubtob alas 6:30 sang gab-i, nga may isa ka oras nga lunch break.
Suno kay Atty. Luvim, ang mga empleyado kinahanglan nga magtapos sang 40 ka oras nga trabaho sa sulod sang apat ka adlaw.
Dugang pa niya, ang nasambit nga tikang nagatuyo agud makakinot sa gatong, pagpanubo sang gasto sa operasyon, kag pagpataas sang produktibo, samtang ginasiguro nga ang mga serbisyo publiko nagapabilin nga episyente kag mahipid.
Apang ang mga empleyado sa frontline services, ilabi na sa mga ospital, magapadayon sa ila regular nga schedule agud indi maapektuhan ang pagpadayon sang serbisyo sa mga Capisnon.
Ginapanugyanan ang tanan nga mga tinawo nga magkooperar sa pagbag-o agud mangin mas epektibo ang gobyerno kag makatipid sa paggamit sang gatong, bilang kabahin sang mas malapad nga mga tikang sa enerhiya kag operasyon.
