Mas ginpasangkad sang Capiz Provincial Government ang border control agud ma-control ang pagsulod kag pagguwa sang mga pork products sa probinsya bilang kabahin sang mga tikang agud mapunggan ang posible nga paglapta sang African Swine Fever (ASF).
Sa interview sang Bombo Radyo kay Dr. Leonel Abordo, consultatnt sang Capiz Provincial Veterenary Office, iya ginpahayag nga nagpagwa man sang Executive Order sa pagpanguna ni Capiz Governor Fredinil Castro agud gilayon nga mapunggan ang iligal nga pagsulod sang buhi nga baboy kag karne sang baboy halin sa mga lugar nga may nabalhag na nga kaso sang ASF, partikular sa Negros kag Iloilo.
Suno Abordo, nagtukod man ang provincial government sang Task Force ASF nga magabantay sa mga border points kag iban pa nga high-risk areas agud masiguro nga wala sang makasulod nga mga pork products nga posible nga may dala sang virus sang ASF.
Nahibaluan nga pila na ka mga kabanwahanan kag syudad ang nagpositibo ang mga blood samples sang baboy lakip na ang Panitan, Pontevedra kag Roxas City.
Samtang, nagpahanumdom man ang opisyal sa mga hog raisers nga mag-report dayon sa veterinary office ukon sa barangay kon may makit-an nga indi normal nga sintomas sang ila mga hinuptanan nga baboy agud malikawan ang posible nga paglapta sang ASF sa bug-os nga probinsya.
