Nagahanda na ang Capiz Provincial Government ang mga safety measures agud mapunggan ang paglapta sang ASF sa probinsya sang Capiz.
Sa interview sang Bombo Radyo kay Vice Governor Jaime ‘Mitang’ Magbanua, iya ginpahayag nga magapatigayon sang hugot nga pagbantay sa border sang tagsa ka mga kabanwahanan nga apektado agud masigurado nga wala sang may makasulod nga mga kontaminado nga karne sang baboy.
Suno kay Magbanua, nagapakig-angot man ang iya talatapan sa mga local government unit, Provincial Veterinary Office kag Office of the Agriculturist Office nga mangin mabinantayon kag mag-monitor sang sitwasyon sang ila sini mga nasakupan.
Pahayag pa niya, handa man nga magpagwa sang resolution ang provincial government nga makabulig sa mas madasig nga paghatag solusyon batok sa pamahog sang virus.
Nagpanawagan man ang natungdan sang kooperasyon sa publiko lakip na nga magbakal lamang sa mga lehitimo nga balaligyaan sang karne sang baboy kag kun mahimo, insigida nga mag-report kun may yara sang kaso sang pagkamatay sang mga hinuptanan nga baboy para sa madasig nga pagtapna.
