Sa pagdamo sang kaso sang Red-Striped Soft Scale Insect (RSSI) nga nagahalit sa mga pananom, ilabi na sa mga katubuhan sa Capiz, ginpangunahan sang Gobyerno Probinsyal sang Capiz sa pagpanguna ni Gobernador Fredenil H. Castro ang pagdiskusyon sang Agosto 7 agud mapangita ang epektibo nga tikang sa pagpugong sa paglapnag sang amo nga peste kag mapanalipdan ang pangabuhian sang mga mangunguma sa probinsya.
Ginhinalaan sa nasambit nga paghinun-anon ang mga tikang kag estratehiya nga kinahanglan ipatuman agud mapunggan kag matapna ang halit nga ginadala sang amo nga insekto, nga nagapangguba sa industriya sang tubo paagi sa pagsuyop sang sustansya sang mga dahon sang tanom.
Ini mahimo magresulta sa pagnubo sang produksyon sang asukar kag iban pa nga produkto nga nagadepende sa tubo.
Ginpaabot naman ni Governor Fredenil H. Castro ang madasig nga pagresponde sang mga may kaangtanan nga ahensya kag sektor sa amo nga problema sa agrikultura, lakip na ang pag-usisa sa posibilidad sang State of Calamity sa mga lugar nga lubos nga naapektuhan sa masunod nga mga inadlaw.
Kabahin sa paghinun-anon ang mga representante sang Office of the Provincial Agriculture, mga Municipal Agriculturist sang mga banwa sang President Roxas kag Panitan, Pontevedra Mayor Henry Tumlos, mga katapo sang Provincial Agricultural and Fishery Council, mga representante sang Capiz Sugar Central Inc., kag mga myembro sang mga asosasyon nga nagatanom sang tubo sa probinsya.
