ROXAS CITY – Ginkumpirma sang chairman sang Committee on Education sa Sangguniang Panlalawigan ang pagpadala sang sulat Ni Governor Esteban Evan Contreras II sa provincial board nga nagahinyo nga amyendahan ang Ordinance No.068 Series of 2019 ukon ang Capiz Provincial Government Scholarship and Assistance program sang gobyerno probinsiyal.
Ginpahayag ni Board Member Thea Faith Reyes nga gilayon gintun-an ang request sang gobernador kag nakit-an nga balido ini rason nga ila ginpapasar ang nasambit nga amendment.
Kalakip sa mga gin-amyendahan sa scholarship program sa private university and colleges sa diin mahimo nga maka-eskwela ang mga scholars sang gobyerno sa mga buluthuan sa probinsiya sang Capiz.
Apang sa mga state colleges mahimo nga maka-eskwela sa bisan diin nga eskwelahan sa Rehiyon 6 ang mga scholars sang gobyerno probinsiyal.
Pagadulaon man ang panel interview sa baylo mangin balasehan sa pagpili sa mga deserving scholars sang gobyerno ang written examination kag pila ka documentary requirements.
Pag-abot naman sa educational financial assistance program sang gobyerno nag-alokar na sang singko porsyento nga assistance sa mga kwalipikado nga kabataan sa mga solo parent kag singko porsyento sa mga kwalipikado nga anak sang empleyado sang gobyerno probinsiyal.
