Ginpahanumdom sang Provincial Health Office ang importansya sang Measles-Rubella (MR) vaccine sa sa mga kabataan batok sa tigdas kag rubella sa idalom sang Measles-Rubella Supplemental Immunization Activity (MRSIA) ukon Ligtas Tigdas Campaign nga ipatuman sa bulan sang Agosto.
Sa interview sang Bombo Radyo Roxas kay Julius Vicson De la Cruz, Nurse V sang Capiz Provincial Health Office, iya ginpahayag nga ang pagpabakuna amo ang pinakaepektibo nga paagi agud malikawan ang paglapta sang nasambit nga balatian kag maprotektahan ang kabataan sa komplikasyon.
Suno kay De la Cruz, ang tigdas isa sa pinakamadasig maglapta nga viral infection nga mahimo magresulta sa pulmonya, impeksyon sa utok, pagkabulag ukon kamatayon, samtang ang rubella naman ang delikado ilabi na sa mga nagabusong bangud mahimo ini magresulta sa depekto sa bata.
Pahayag pa niya, luwas, epektibo kag tested sang Department of Health ang Measles-Rubella vaccine.
Nagpanawagan man ang natungdan sa tanan nga ginikanan nga suportahan ang Ligtas Tigdas Campaign pinaagi sa pagpabakuna sang ila mga kabataan sa mga libre nga vaccination sites sang tagsa ka Rural Health Unit kag Local Government Unit.
