ROXAS CITY- Kadungan sa pagselebrar sang 2023 Global Handwashing Day subong nga adlaw Oktobre 15, 2023, ginsaysay sang katapo sang Capiz Provincial Health Office ang importansya sa paghugas sang kamot.
Sa interview sang Bombo Radyo kay Mr. Ayr Altavas tagpamaba sang Capiz Provincial Health Office kag Mrs. Susana Basulgan-Agojo Co-Manager Environmental and Occupational Health Program, ginpahayag sang mga ini nga ang paghugas sang kamot kung mahimo sang instakto isa ka importante nga buluhaton sa kaugalingon agud malikawan nga makakuha sang mga makalalaton nga sakit.
Ang 2023 Global Handwashing Day, ang nagsugod sadtong 2008 kung sa diin gintukod sang pila ka mga ahensya may kaangatanan sa ikaayong lawas nagikan sa nagkalain-lain nga pungsod.
Tinutuyo sini agud mahatagan sang importansya ang paghugas sang kamot, ma-edukar ang tanan ilabi na ang mga kabataan agud malikawan kag mabuhinan ang mga sakit ukon respiratory infections.
Mahibaluan nga pinaagi sa paghugas sang kamot, 25% pataas napamatud-an nga nakapiyan-piyan ini sa pila ka mga sakit.
Ginpakigbahin man nanday Altavas kag Agojo, kung san-o bala kinahanglan maghugas sang kamot?
Una, antes maghawid ukon mag-uyat sang nawong, mata, ilong kag bibig, ika-duha antes magkaon, pagkatapos magamit sang Comfort Room, pagkatapos mag-ubo ukon maghatsing, pagkatapos maghawid sang mga pampubliko nga instalasyon ukon kagamitan kaparehas sang mga halawiran sang escalator, mga pindutan sang elevator ukon pirtahan.
May yara man sang mga tikang kung paano hugasan sang intsakto ang mga kamot, una, basaon ang kamot sang tubig, ika-duha magbutang sang sabon kag kuskuson ang mga kamot agud magbula, kuskuson ang mga palad, likod sang kamot, mga tudlo, punta sang tudlo kag pulsuhan kag himuon ini sang 20 segundo, ika-tatlo banwalan sang instakto ang kamot, pamalhon sang instakto gamit ang matinlo nga cotton nga tuwalya kag kinahanglan indi direkta nga uyatan ang gripo gamit ang matinlo nga kamot.
Panugyan sini sa tanan nga ipabilin kag mangin ihemplo sa mga kabataan kag suguran ini mismo sa tagsa ka mga puluy-an.
