ROXAS CITY-Gintalakay sa sinapol sang Provincial Liga ng mga Barangay sa probinsya sang Capiz ang petisyon sang pito ka mga Punong Barangay batuk sa pagpahalin sa puwesto bilang Liga ng mga Barangay President Gina Yelo sang Barangay Bilao, Sapian Capiz.
Ini ang ginkompirmar ni Provincial Liga ng mga Barangay President Querubin Pamplona sang mainterview sang Bombo Radyo.
Suno kay Pamplona nga nagpatigayon sila kahapon nga adlaw sang sinapol kaupod ang Liga ng mga Barangay President sang mga kabanwwahan kun sa diin wala nakatambong si Punong Barangay Gina Yelo.
Ginpahayag ni Pamlona nga pagapadalhan sini sang sulat ang pito ka mga kapitan agud pangayuan sang nagakaigo nga mga dokyumento natuhoy sa ila nga reklamo batuk kay kay Yelo.
Kalakip na diri ang minutes of meeting nga magapamatuod nga wala nagapatawag sang sinapol si Yelo sa siyam ka mga kapitan sa banwa sang Sapian agud hinalaan kun ano ang ikaayo sang banwa.
Dugang pa ni Pamplona nga kinahanglan nga may yara sang mga suporting documents ang pito ka mga opisyal sa barangay sa petisyon nga ila ginsumiter sa National Liga nga mga Barangay.
Ginkompirmar sini nga napadala na kay Hon. Eden Pineda ang National Liga ng mga Barangay President ang petition letter nga ginpirmahan sang pito ka mga kapitan.
Gin-athag ni Pamplona nga wala ini sang gahum nga magdesisyon kun ano ang mangin disposisyon ni Yelo bangud maga-agi pa ini sa lebel sang Regional Liga ng mga Barangay kun sa diin ginatugyan sini ang mangin desisyon batuk sa reklamo kay Yelo.
Matandaan nga pito ka mga Punong Barangay sa nasambit nga banwa ang nagpirma sa petisyon nga sipaon sa puwesto bilang Liga ng mga Barangay President sa banwa sang Sapian si Punong Barangay Gina Yelo sang Barangay Bilao bangud sa kapaslawan sini nga magpatigayon sang sinapol kada bulan, kapaslawan sini nga mahatagan sang pagtamod ang kaayuhan ukon general welfare sang Liga kag kakulangan sini sang plano kag programa sa mga kabarangayan sa nasambit nga banwa.
Kalakip sa mga nagpirma amo ang mga kapitan sang Barangay Poblacion, Barangay Agsilab, Barangay Lonoy, Barangay Damayan, Barangay Majanlud, Barangay Agtatacay Sur kag Barangay Maninang. Samtang wala nalakip sa nagpirma ang mga kapitan sang Barangay Agtatacay Norte kag Barangay Dapdapan.
