ROXAS CITY – Naghatag sang paathag si Capiz provincial administrator Edwin Monares natuhoy sa wala pagbaton sang sweldo sang pila ka mga job order employees sa Roxas Memorial Provincial Hospital.
Suno kay Monares, wala maswelduhan ang kapin sa 50 ka mga job order employees bangud man mismo sa ila kapabayaan.
Ginpahayag sini nga may gina-uyatan siya nga listahan sang nasambit nga mga empleyado kag nasaad man diri kun ano ang rason nga indi pa mabaton ang ila sweldo para sa bulan sang Hulyo kag Agosto.
Suno kay Monares nga nagaguwa nga absent ang nasambit nga mga empleyado humalin Hulyo tubtob Agosto bangud wala sila sang Daily Time Record (DTR) nga tuman ka importante agud mapamatud-an nga sila ang nag-duty sa nasambit nga period.
Wala man ang mga ini nakasumiter sang ila monthly accomplishment reports.
Isa pa sa rason nga indi sila maswelduhan bangud wala pa sila sang Bureau of Internal Revenue (BIR) registration kag ATM application.
Suno kay Monares nga ginhambalan naman ang nasambit nga mga empleyado nga hikuton ang nasambit nga mga rekisitos apang tubtob subong wala sila naga-comply.
Indi man mahimo nga ihatag nalang suno kay Monares ang ila nga sweldo bangud sang kaluoy bangud sa ulihi ang gobyerno-probinsiyal man ang magapanabat kun kulang ini sang mga dokumento.
