ROXAS CITY – Pagapamatian sang provincial board ang bahin sang pamunuan sang Roxas Memorial Provincial Hospital sa ikaduha nga adlaw sang legislative inquiry in aid of legislations natuhoy sa natabo nga pagkamatay sang apat ka mga pasyente sa sulod sang Intensive Care Unit (ICU) sang amo nga ospital sadtong nakaligad nga Disyembre 25, 2019.
Ini ang ginpahayag ni Board Member Jonathan Sonny Besa, chairman sang Committee on Finance and Appropriations sang Sangguniang Panlalawigan sang mainterview sang Bombo Radyo.
Mahibaluan nga sa una nga adlaw sang inquiry, nagtambong ang pamilya sang apat ka mga pasyente nga napatay.
Suno kay Besa nga ginpadal-an naman sila sang imbitasyon ang mga opisyales sang ospital nga ginalakipan sang chief of hospital, head nurse, maintenance division kag iban pa agud magpaathag sang ila bahin natuhoy sa nasambit nga insidente.
Ginklaro ni Besa nga ang amo nga inquiry ang may katuyuan nga mapasangkad pa ang serbisyo sang ospital.
Diri sila magaba-se suno kay Besa kun ano pa ang mahimo nga madugang sa ospital agud mapaayo ang ila nga serbisyo.
Sa una nga adlaw sang inquiry suno kay Besa, nagpahayag ang pamilya sang duha ka mga pasyente nga napatay nga kumbinsido sila nga bangud sang pagbisyo sang generator set sang nagluntad ang blackout ang rason sang kamatayon sang ila nga himata.
May pamilya naman nga aminado nga yara na gidman sa kritikal nga kondisyon ang ila pasyente kay may yara na sang kuryente sa ospital sang ini ang napatay.
Ang pamilya naman sang isa pa gid ka pasyente nga napatay ang nagapati nga ang atrasado nga pagbasa sang CT scan results sang ila himata ang rason kun ngaman napatay ini.
Pagausisaon man suno kay Besa ang pamunuan sang ospital natuhoy sa ila natukiban nga may yara lamang sang duha ka mga ventilator ang ICU sang ospital kun sa diin ang isa diri ang ginapahayag nagabisyo pa.
Enero 29 natalana nga patigayunon ang ikaduha kag katapusan nga adlaw sang nasambit nga inquiry.
