ROXAS CITY – May yara sang emergency hiring sang mga medical frontliners ang gobyerno-probinsiyal sang Capiz.
Ini ang ginpahayag ni Provincial Administrator Edwin Chinel Monares sang mainterview sang Bombo Radyo.
Kasunod ini suno kay Monares sang pag-positibo sa coronavirus disease (COVID-19) sang pila ka mga medical frontliners kag ang iban naman ang nag-resign.
Ginpahayag sini nga magabaton sang sweldo nga P50, 000 ang iga-hire nga mga doktor; P20, 000 para sa nurses; P17, 000 para sa nursing attendants kag may yara sang PhilHealth share kag hazard pay.
Nagapati naman si Monares nga indi ang atrasado nga sweldo ang mayor nga rason sang pag-resign sang iban nga mga medical frontliners kundi ang pagkahangawa sa ila nga health security.
Ginsabat man sini ang isyu sang pagkaatrasar sang sweldo sang pila ka mga Job Order (JO) kag Contract of Service (COS) nga mga medical frontliners.
Suno diri nga nagakaatrasar ini bangud may yara sang ginasunod nga nagakaigo nga proseso kag bangud man sa pandemiya, naatrasar pa ini bangud man sa work stoppage sa kapitolyo-probinsiyal.
Apang sa karon suno kay Monares, ginapadasig na nila ang pagsweldo sa mga ini kag suno sa iya ‘anytime soon’ iga-anunsiyo kun sa diin kag paano makuha ang voucher kag payroll sang mga medical frontliners nga na-delay ang sweldo.
