ROXAS CITY – Nagapadayon ang pagbaton sang aplikante nga luyag magpasakop sa Capiz Scholarship and Educational Assistance Program sang kapitolyo probinsyal sa idalom sang pagpamuno ni Governor Fredenil “Oto” Castro.
Ini ang ginkumpirmar ni Hon. Thea Faith Reyes sang mapakig-angutan sang Bombo Radyo.
Ginsiling sini nga sang nakaligad nga semana nagsugod na sila sang pagppanguha sang forms nagikan sa municipal coordinators sa tagsa ka kabanwahanan kag ginpasa na ini sa scholarship secretariat.
Temporaryo man suno diri nga ginpaiway ang pagpangayo sang BIR certificate bangud natukiban sini nga dugang galastuson kag kabudlay pa ini sa mga aplikante nga indi man luyag ni Gov. Castro.
Bangud diri, nagpangayo si Reyes sang suhesityon kanday BM Besa kag Vice Gov. Magbanua kag didto ginpakamaayo nga ang iban nalang nga rekisitos ang pangayuon maluwan sa BIR certificate.
Apang sa tion nga makapasar sa interview kag exam, didto kag i-require na magpasa sang certificate nagikan sa BIR ang mga aplikante, pinaagi sa pagpasa sini mahibaluan kun nagakinahanglan gidman sang bulig ang estudyante.
Sa pagpanguna man ni Gov. Castro kag Vice Gov. Magbanua gindugangan ang pondo para sa scholarship bangud luyag man sang gobyerno probinsyal nga madamo pa sang mabuligan nga kwalipikado nga estudyante.
Sa pihak sini, padayon pa nga ginaberipika ang listahan sa mga nakaligad nga administrasyon kag ginabulabanta 100 ka mga iskolar ang pagakuhaon sa tagsa ka banwa lakip na diri ang merit-public kag merit-private apang indi paman ini sang pinal.
Prayoridad sang scholarship ang mga incoming 1st year college kag pagatagaan sang slots ang mga nabilin nga college year level.
Dugang pa ni Reyes nga target nila nga magpatigayon na sang eksaminasyon sa una nga semana sang Oktubre.
Mensahe sini sa mga kolehiyo nga estudyante sa Capiz nga mahimo maka-apply basta kumpleto lang ang rekisitos nga ipasa kag makapasar sa exam kag interview bangud patas ini para sa tanan kag wala ginapili.
