ROXAS CITY – Gin-aprubahan na sang Sangguniang Panlalawigan ang ordinansa nga may tigulo Capiz Scholarship and Educational Assistance Program nga may katuyuan nga bag-uhon kag mapaayo pa ang scholarship program sang gobyerno-probinsiyal.
Ini ang ginkompirmar ni Board Member Thea Faith Reyes, ang chairman sang Committee on Education, Science and Technology sang Sangguniang Panlalawigan sang mainterview sang Bombo Radyo.
Suno kay Reyes nga wala na sang madamo nga palamangkutanon ang iya mga kaupdanan sa konseho natuhoy sa amo nga ordinansa bangud sa pag-draft pa lamang sini, iya na nga ginsiguro nga mahatagan ang mga ini sang kopya agud mahangpan sang maayo ang kaundan sang ordinansa.
Sa idalom sang nasambit nga ordinansa, may yara sang nanari-sari nga grupo ukon classification sang scholars nga ginalakipan sang MERIT SCHOLARS, SCECIAL COURSES SCHOLARS, TECH-VOC SCHOLARS, EDUCATIONAL ASSISTANCE PROGRAM SCHOLARS.
Sa MERIT SCHOLARS, magabaton sang 500 ka mga first year students scholars kun sa diin 250 diri ang sa private schools nga magabaton sang P5, 000 per semester kag 250 naman sa public schools nga magabaton sang P2, 500 per semester nga may maintaining average nga 85 percent with no failing grade.
Pag-abot naman sa SPECIAL COURSES SCHOLARS, may yara sang 125 ka mga aplikante nga batunon sa baylo nga ang ila kuhaon nga kurso amo ang environmental management, veterinary medicine, agriculture and fisheries courses.
Sa sini nga programa magabaton ang mga freshmen scholars sang P10, 000 per semester.
Para naman sa TECH-VOC SCHOLARS, paga-akomodaron ang mga out-of-school youth, unemployed adult, solo parents kag mga nagtapos sang Alternative Learning System (ALS) kun sa diin ini ang pagapondohan sang gobyerno-probinsiyal sang P1 milyon kada tuig magluwas pa sa igahatag nga counterpart sang Technical Education and Skills Development Authority (TESDA).
Sa EDUCATIONAL ASSISTANCE PROGRAM SCHOLARS naman, 500 ka mga estudyante ang akomodaron nga gikan sa pinaka-pigado nga pamilya sa baylo nga makapasar ang mga ini sa qualifying examination.
Diri magabaton sang P1, 000 per semester ang isa ka scholar tubtob sa ini ang makatapos sa pag-eskwela sa baylo nga may yara ini sang 75 percent nga general average kag wala sang failing grade.
Ginpatpat naman ni Reyes ang pila ka mga kwalipikasyon sa pag-apply para sa Capiz Scholarship and Educational Assistance Program sang gobyerno-probinsiyal.
Suno kay Reyes nga kinahanglan ang tanan nga aplikante ang registered voters sang probinsiya sang Capiz kag residente sang Capiz, isa ka tuig ukon masobra pa antes ini nag-apply para sa amo nga programa.
Nagakadapat man suno kay Reyes nga ang ginikanan sang isa ka aplikante ang indi maglapaw ang income sa P200, 000 kada tuig kag nagtapos sang secondary education sa probinsiya sang Capiz.
Suno pa kay Reyes nga may mga probisyon man ang nasambit nga ordinansa agud malikawan ang political accommodation sa nasambit nga programa.
Suno diri nga indi mahimo nga batunon ang sinuman nga aplikante nga paryenti sang elected officials kag miyembro sang scholarship committee tubtob sa 3rd degree.
Suno kay Reyes nga mangin epektibo ang nasambit nga programa sa pagsugod sang school year 2020.
Ginpasalig naman ni Reyes nga indi pagpabay-an sang gobyerno-probinsiyal ang mga existing scholars gikan sa nakaligad nga mga administrasyon bangud pagahatagan gihapon ang mga yara sa private school sang P5, 000 kag P1, 000 naman sa public schools.
Apang sa pagsugod sang bag-o nga scholarship program sang gobyerno-probinsiyal, ginaganyat sang opisyal ang mga existing scholars sa pag-apply para sa bag-o nga programa agud makaagum sang bulig sa ila nga pag-eskwela.
