ROXAS CITY – Wala pa may nabaton nga sulat ang Department of Education (DepEd) Capiz Division angut sa ginpalab-ot nga sulat sang PTA President sang Feliciano Yusay Consing National High School sa President Roxas, nga luyag nila paimbestigahan ang ila principal nga si Dr. Quinto Tagoc Jr., bangud sa ginaalegar mga anomaliya sa amu nga bulothoan.
Sa interview sang Bombo Radyo kay Dr. Miguel Mac Aposin, Capiz Schools Division Superintendent, suno diri, pagarespetuhon kag pagasundon sang ila talatapan ang mangin proseso angut sa nasambit nga imbestigasyon.
Gindugang pa ni Aposin nga ang ila grievance committee ang nagaakomodar sang DepEd to DepEd matters, kaangay sang reklamo sang manunudlo sa kaangay sini manunudlo, kag indi sakup sang sini nga komite ang mga reklamo sang isa ka persona nga wala nagatrabaho sa DepEd batuk sa taga-DepEd.
Bangud wala pa ini may nabaton nga sulat, indi luyag ni Aposin nga pangunahan ang amu nga reklamo ukon hinyo nga imbestigaran ang principal, kag ginatugyan nalang sa natungdan nga ahensya.
