Gintumod sang Capiz Provincial Government nga top priority ang Panay River Basin Integrated Development Project agud masolusyonan ang problema sa baha sa probinsya.
Suno kay Capiz Provincial Administrator Arthur John Biñas , importante ang proyekto bangud kinahanglan ini sa pagpabaskog sang flood mitigation, disaster resilience, environmental sustainability, water security, climate adaptation, kag long-term economic development sa mga lugar nga masakop sang Panay River Basin.
Nahibaluan nga padayon nga naga-eksperyensya sang pagbaha ang Capiz ilabi na ang mga yara sa
low-lying riverside communities nga nagaapekto sa mga residente, palangabuhian kag sa local economic activities.
Ang Panay River Basin ang magasuporta sa agrikultura, pagpangisda, biodiversity, transportasyon, kag palangabuhian sang linibo ka mga residente.
Pahayag pa niya, ang proyekto naga-promote sang integrated kag science-based approach sa river basin management.
Ini ang ginalakipan sang watershed protection, sustainable land use, ecological rehabilitation, infrastructure improvements, kag mga tikang nga may katuyoan nga mapabaskog pa ang long-term economic resilience.
Sa tion nga mapatuman, ang proyekto ang ginalauman nga maka-generate sang ginabanta 18.42 megawatts sang hydroelectric power kag makapahagan-hagan sang pagbaha sa mga lugar nga yara sa sub-basins sang suba.
Sa subong, padayon nga nagapakig-angot ang provincial government sa national government agencies kag iban pa agud mapabaskog ang pagplano kag pagtuman sang nasambit nga proyekto.
