-- ADVERTISEMENT --
Nagapangayo sang bulig ang Capiz Veterans matapos liwat nga gin-vandalize kag kawatan ang ila Wall of Heroes kag opisina sa ikatlo na ka beses.
Sa interview sang Bombo Radyo Roxas kay Retired Colonel Romulo Magdaluyo, secretary sang Veterans Federation of the Philippines kag district vice president, ginpahayag niya nga daku ang ila kasubo bangud ginuba na naman ang kandado kag CCTV, ginkuha ang nagkalain-lain nga kagamitan kag petty cash nga ginatipon kuntani bilang pondo para sa mga kinahanglanon sang opisina.
Suno kay Magdaluyo, indi mahimo nga rason ang kagutom agud higkuan, butangan sang basura, kag gub-on ang Wall of Heroes. Ginlaragway niya ini nga isa ka paglapas sa respeto sa mga ngalan sang mga anay sundalo nga nagpakigbato kag naghalad sang ila kabuhi agud maangkon sang pungsod ang kahilwayan.
Bangud ikatlo na ini ka insidente sang pagpangawat, gin-ilisan na naman ang kandado sang opisina.
Dugang pa sini, wala pa sila sang ideya kon sin-o ang responsable sa sunod-sunod nga insidente ukon ngaa ang Veterans Center ang ginapili nga target sang vandalism kag pagpangawat.
Ginapanawagan man sang natungdan ang bulig sang komunidad kag mga kinamhan sa pag-imbestigar agud mapanabat ang mga responsable kag maprotektaran ang nasambit nga memorial.
