CAPIZ-Naghinun-anon ang mga opisyal sang League of Vice Governors of the Philippines (LVGP) sa Chinese Embassy bilang preparasyon sa ila natalana nga pagbiyahe pakadto sa China para sa Benchmarking Foreign Study Mission.
Kabahin sa mga nagtipon sa espesyal nga panihapon kag pre-departure meeting si Capiz Vice Governor James “Mitang” Magbanua, Executive Vice President for Visayas sang LVGP, upod ang iban pa nga mga opisyal sang liga.
Sa amo nga pagtililipon, nakipag-istoryahanay ang mga opisyal sang LVGP kay Zhou Zhiyong, Deputy Chief of Mission Minister-Counsellor sang Chinese Embassy. Ginhisgutan sa miting ang mga preparasyon kag katuyuan sang natalana nga study mission sa China, ilabi na ang pagtuon kag pagbenchmark sang mga programa, proyekto kag pamaagi sang pagdumala.
Paagi sa foreign study mission, pagahatagan sang oportunidad ang mga bise gobernador nga makita kag matun-an mismo ang nagkalain-lain nga praktis kag pamaagi nga ginapatuman sa China, nga mahimo nila ikonsiderar sa pagpauswag sang mga programa kag serbisyo sa ila tagsa-tagsa ka probinsya.
Para kay Vice Governor Magbanua, ang iya pag-upod bilang Executive Vice President for Visayas nagahatag man sang oportunidad nga marepresentar ang mga bise gobernador sang rehiyon kag makakuha sang dugang nga kahibalo kag eksperyensya nga mahimo magamit sa pagpauswag sang lokal nga pagdumala.
Ang amo nga panihapon kag pakipagpulong nagserbe nga pre-departure meeting sang LVGP officials antes sang ila natalana nga pagbiyahe pakadto sa China para sa benchmarking mission.
