ROXAS CITY – Ginkumpirmar ni Dr. Ramon Alex Nolasco, Provincial Health Officer II sang Capiz Provincial Health Office nga wala na sa karon sang aktibo nga kaso sang COVID-19 ang probinsya sang Capiz.
Ini matapos nga nag-ayo na ang katapusan nga nalatnan sang amu nga balatian sa probinsya.
Samtang, sa pihak nga wala na sang narekord nga kaso sang COVID-19 sa probinsya, pagapadayunon sang Capiz PHO ang ila adbokasiya nga pagpabaskog kag pagpabilin sang health protocol kaangay sa pagsuksok sang face mask kag pagpabakuna ilabi na sang booster shot.
Nahibaluan nga manubo ang porsyento sang mga nagapabakuna naga-edad 5 tubtob 11 katuig, gani kinahanglan sang mga ini nga mapaintindi sa ginikanan ang kaimportansya sang bakuna sa bata, ilabi na nga naga-eskwela ang mga ini.
Subong man, magapadayon ang ila pagkumbinse sa mga senior citizen nga magpabooster shot bangud ini sila ang makabig nga vulnerable sa mau nga balatian.
Mensahe ni Nolasco nga indi mangin kampante, sa baylo, padayon nga maghalong batuk sa virus.
