Capiz, wala na sang COVID-19 active cases matapos makaguwa na sa ospital ang nabilin nga COVID-19 patient

ROXAS CITY – Wala na sang coronavirus disease (COVID-19) active cases sa probinsiya sang Capiz. 

Ini matapos nakaguwa na sa ospital sa Iloilo City ang nabilin nga COVID-19 patient sa probinsiya. 

Ini kasunod sang pagkompirmar sang The Medical City-Iloilo nga na-discharged na sa ospital ang 25 anyos nga COVID-19 patient nga residente sang siyudad sang Roxas. 

Mahibaluan nga ang nasambit nga pasyente na lamang ang nabilin nga COVID-19 patient nga narekord sa Capiz. 

Una na nga nakapagkit ang probinsiya sang 5 ka mga COVID-19 cases kun sa diin ang duwa diri ang narekord nga napatay kag ang tatlo ang dalayon na nga nakarekober.