ROXAS CITY – Wala na sang coronavirus disease (COVID-19) active cases sa probinsiya sang Capiz.
Ini matapos nakaguwa na sa ospital sa Iloilo City ang nabilin nga COVID-19 patient sa probinsiya.
Ini kasunod sang pagkompirmar sang The Medical City-Iloilo nga na-discharged na sa ospital ang 25 anyos nga COVID-19 patient nga residente sang siyudad sang Roxas.
Mahibaluan nga ang nasambit nga pasyente na lamang ang nabilin nga COVID-19 patient nga narekord sa Capiz.
Suno sa Public Information Office sang Capiz Provincial Health Office nga si Mr. Ayr Altavas, wala na karon sang COVID-19 active cases sa probinsiya bangud sa narekord nga 5 ka mga kaso, duha diri ang narekord nga napatay kag tatlo ang dalayon na nga nakarekober.
Ginpahayag ni Altavas nga agud masiguro ang masangkad nga kampanya kontra COVID-19, nagapadayon ang ila nga surveillance system.
Base sa Capiz Epidemiological Surveillance and Response Unit (CESRU), sa narekord nga 98 ka mga suspected cases sa probinsiya nga ginalakipan sang mga Persons Under Monitoring (PUM’s) kag Person’s Under Investigation (PUI’s), 77 ang fully-recovered. kag may pipila na lamang nga nagapaidalom sa home quarantine kag community isolation.
Sa nasambit nga numero, 11 diri ang napatay apang siyam sa mga ini ang negatibo sa nasambit nga balatian.
Ginkompirmar man ni Altavas nga 157 tanan ang narekord nga High Risk Contacts (HRC’s) sa probinsiya kun sa diin kadamuan sa mga ini ang mga frontliners kag 112 sa mga ini ang negatibo sa COVID-19 samtang may masobra nga 40 pa nga ginahulat ang resulta.
