ROXAS CITY – Wala pa sang nabalhag nga local transmission sang Omicron variant sa probinsya sang Capiz.
Ini ang ginpahayag ni Mr. Joeffrey Espiritu, tagpamaba sang Department of Health – Capiz sang mainterview sang Bombo Radyo.
Apang, suno diri, ginahulat sa karon sang ila ahensya ang resulta sang ginpadala nga specimen nga ginpaidalom sa genome sequencing sa Metro Manila, agud matumod kun ano nga variant sang nasambit nga virus ang nagalapta sa probinsya.
Sa pihak nga bahin, liwat nga ginpaalinton ni Espiritu nga wala sang specific COVID-19 vaccine nga ginrekomendar ang World Health Organization (WHO) nga amu ang makaprotektar sa pinakabag-o nga variant sa kalibutan.
Nagakahulugan, nga bisan ano nga brand sang COVID-19 vaccine ang makahatag sang proteksyon sa makamamatay nga sakit.
Ginpahayag man ni Espiritu nga apisar magpositibo sa amu nga virus ang isa ka indibidwal nga bakunado, dako ang tyansa nga indi mahulog sa severe nga kondisyon ang iya nabatyag nga sintomas.
Makahatag man suno diri sang dugang nga proteksyon ang booster shots sang bisan ano nga brand.
Sa ila man pagmonitor sa mga indibidwal nga subong palang nagpabakuna, ginpahayag sini nga kadam-an sa mga ini ang wala nahadlok sa virus, kundi luyag nila nga makasulod sa mga talatapan diri sa syudad kag probinsya.
Sa datos sang COVID-19 cases sa probinsya, as of January 15, 2022 may panibag-o nga 75 ka mga nagpositibo, 23 ang dugang nga nakarekober kag wala sang dugang nga ginbawian sang kabuhi.
Sa karon, nagsaka sa 357 ang aktibo nga kaso sang COVID-19 sa probinsya.
Sa nasambit nga datos, 98.04% sa mga pasyente ang mga mild kag asymptomatic cases, samtang 1.97% diri ang moderate, severe ukon critical cases.
