Wala sang kumpirmado nga kaso sang tipdas sa probinsya sang Capiz humalin sang Enero tubtob Hunyo 2026.
Sa interview sang Bombo Radyo kay Mr. Joeffry Espiritu, Development Management Officer IV/Information Officer, Department of Health (DOH)-Capiz, iya ginpahahayag nga padayon ang surveillance kag monitoring sang ahensya may kaangtanan sa nasambit nga balatian.
Suno kay Espiritu, sang tuig 2025, may yara sang 20 reported cases sang tipdas sa diin tatlo diri ang kumpirmado.
Apang base sa data sang DOH, wala nalab-ot sang Capiz ang 95% ukon 13,975 nga mga kabataan kuntani nga nabakunahan sang tuig 2025.
Pahayag niya, yara lang sa 9,278 ukon 60% ka mga kabataan ang nabakunahan sang kompleto.
Dugang pa sang natungdan, kinahanglan nga malab-ot ang 95% nga herd immunity agud indi madali nga malatnan ang mga unvaccinated individuals bangud madamo ang protektado batuk sa mga balatian.
