ROXAS CITY, CAPIZ – Wala sang kumpirmado nga kaso sang MPox sa probinsya sang Capiz.
Ini ang gin-athag sang Capiz Provincial Health Office matapos makarekord sang duha ka kaso sang MPox ang Iloilo — isa sa syudad kag isa sa probinsya.
Sa official statement ni Capiz Governor Fredenil Castro, iya ginpahayag nga nakabaton sila sang impormasyon may kaangtanan sa indibidwal nga naga-istar sa guwa sang probinsya nga nakitaan sang sintomas sang nasambit nga balatian samtang nagbisita sa banwa sang Jamindan.
Ginapasiguro sang gobernador nga may pro-active measures na nga ginhimo kag padayon ang pagpatuman sang mga tikang sa pagpugong sa paglapta sang balatian.
Preparado man ang healthcare system sang Capiz sa pagtatap sang mga pasyente nga may balatian.
Nagapanawagan si Governor Castro sa publiko nga gilayon magpakonsulta sa doktor kun maka-eksperyensya sang mga sintomas kaangay sang rash, mouth and genital sores kag nagabanog nga lymph nodes.
