ROXAS CITY – Dako nga bugal para kay Carla Meishien Lucero isa ka Capizeña, matapos nga makakuha sang bulawan nga medalya sa ginpatigayon nga State Colleges and Universities Athletic Association (SCUAA) 2023 sang damlag lang.
Si Lucero isa ka 2nd year college student nga nagakuha sang kurso nga Bachelor of Science in Criminology (BSCrim) sa Capiz State University (CAPSU) Dayao Campus kag tumandok sang San Blas, Pilar Capiz.
Sa interview sang Bombo Radyo kay Lucero, ginpahayag sini nga indi basta-basta nga mga training ang iya na-eksperyensyahan antes makapasakop sa nasambit nga aktibidad.
Mahibaluan nga nakakuha ini sang bulawan nga medalya sa 100 Meter Dash Women Category, silver medal sa 4×100 Meter Mix Relay, bronze medal sa 4×100 Meter Women Relay.
Sa nasambit nga aktibidad 2 lamang ka semana ang ila nangin preparasyon, gani amu na lamang ang pagtimakas ni Lucero agud mangin magmadinalag-on kag ilabi na nga sang tion sang iya paghampang yara ang iya pamilya nagalantaw agud magsuporta.
Bangud sini, indi niya luyag usikan ang pagbyahe sang iya pamilya kag luyag niya nga makapauli sila nga nagayuhom dala ang kadalag-an.
Suno sa atleta, nagsugod ang iya huyog sa patag sang track ‘n field sadtong Grade 3 pa lamang siya tubtob subong kag ini bangud man nga ang iya amay anay nga atleta.
Sa separado naman nga interview kay Mr. Allan Lucero amay sang atleta, ginpahayag sini nga daw kaangay wala sang may masudlan ang iya kalipay nga nabatyagan bangud ang iya handum sadto anay nga wala nalab-ot, nakuha sang iya anak.
Panugyan sini sa mga ginikanan, hatagan sang suporta ang ila kabataan kung sa diin sila may huyog kag masami nga ipahanumdum nga indi pagpabay-an ang pagtuon.
