ROXAS CITY – Ginpahayag sang Capizeña illegal recruiter nga biktima lang man ini kag gin-ako nga yara sa iya live-in partner nga Korean national ang kwarta nga ginbayad sang halos 261 ka mga biktima nga naglaom nga makatrabaho sa Busan, South Korea bilang mga factory workers.
Ini ang ginpahayag sang suspek nga si Ramilyn Andrade sang Barangay Bolo, Roxas City sang nag-atubang ini kay Capiz governor Esteban Evan Contreras kasunod sang pagtuhaw sang mga biktima sang illegal recruitment.
Suno kay Contreras, nagahilibion nga ginhambal ni Andrade nga wala sa iya ang kwarta sang mga biktima bangud yara ini sa account sang koreano nga si Kim Taehyong.
Ginapahayag nga yara sa karon sa Korea si Kim kag suno kay Andrade, nakahanda man ang live-in partner sini nga ibalik ang kwarta sang mga biktima.
Apang direkta naman nga ginhambal sang gobernador kay Andrade nga kun indi sini mabalik ang kwarta sang mga biktima, mismo ang gobyerno-probinsiyal ang pagahimo sang paagi agud mapasakaan ini sang nagakaigo nga kaso.
Mahibaluan nga ang kada biktima ang nagbayad sang linibo nga kwarta kay Andrade para sa placement fee, pocket money, visa kag terminal fee kabaylo sang ginpasalig nga trabaho sa isa ka pabrika sa Busan, South Korea nga ginapahayag ginapanag-iyahan sang tiyo sang Koreano nga si Kim.
Suno naman kay Doroteo Laforteza, isa sa ginatos ka mga biktima, una sila nga ginhambalan ni Andrade nga sadtong Oktubre 20 ang ila flight padulong sa Korea apang wala ini nadayon.
Ginre-schedule ini sadtong Nobyembre 10, apang sa liwat wala naman ini nadayon.
Kag sadtong Nobyembre 12, kun sa diin may mga maleta na nga dala ang mga biktima, ginhambalan sila ni Andrade nga sa liwat, cancelled naman ang ila flight.
Diri na nagduda ang mga biktima kag gin-usisa ang ila ticket kun sa dii nila natukiban nga peke gali ini kag ginmatu-mato lamang sang print ni Andrade.
