ROXAS CITY – Indi sa gihapon makapati ang Capizeña nga nangin Top 1 sa nagguha nga resulta sang Dentistry Licensure Examination sang damlag lang.
Sa interview sang Bombo Radyo kay Dr. Anne Nicole Caeg, Topnotcher sa Dentistry Licensure Examination nga tumandok sang syudad sang Roxas, ginpahayag nga daw indi sa gihapon makapati sa iya naangkon sa subong.
Suno kay Caeg, nahibaluan nalang sini sa iya abyan nga siya ang nakapasa kag nagtop sa nasambit nga exam.
Ginsaysay man sini ang mga naagyan sa tion sang iya pag-eskwela sumugod sang elementary tubtob college kag apisar siya wala makapati sang iya naangkon sa subong bangud indi siya ang klase sang estudyante nga naga-excel pag-abot sa academic.
Mahibaluan nga si Dr. Caeg ang nagtapos sang iya elementary sa syudad sang Roxas kag naghigh school sa Iloilo kag nagkolehiyo sa maynila.
Pahayag pa sini nga, manami ang pagpadako sa iya kag natudluan sang maayo nga pamatasan, disiplinado kag natun-an sini ang time management nga ginatawag rason nga nahibaluan sini kung paano gamiton ang oras kasubong man nakahibalo ini kung ano ang ginakinahanglan nga iprioritize.
Gani nagamit niya sa tion sang iya pagreview. Ginbalanse sini ang time sa pagtuon kag paghatag sa kaugalingon sang kahigayunan nga makarelax kaupod ang iya mga abyan nga dako ang pagpati nga kaya niya nga mapasa kag matop ang amo nga examin ation.
Sa una pa lamang wala ini nagalaum nga mangin Topnotcher bangud ang ginpangayo lamang sini sa ginoo ang makapasar lamang.
Apang sa pagsalig sa ginoo kag sa bulig sang iya pamilya, kag mga abyan wala ini nadulaan sang paglaum.
Dugang pa sa tion sang iya exam gintuad man sini nga nagsunod ini sa mga pamahiin sa pagkuha sang exam kasubong sang indi pagpa-utod sang Buhok bag-o paman ang exam tubtob nga magguha ang resulta, kag nagsuksok man ini sang pula nga underwear. Sa karon, gina-enjoy sini ang kabuhi bilang board passer kasubong man ang pagiging topnotcher kag wala paman ini sang plano kung ano bala ang masunod niya nga himuon pagkatapos niya nga makapasar.
