ROXAS CITY – Yara na karon sa maayo nga kondisyon ang isa ka Overseas Filipino Worker (OFW) nga ikaduha nga Person Under Investigation natuhoy sa balatian nga 2019 novel coronavirus acute respiratory disease (nCoV-ARD) nga napagkit sang Provincial Health Office (PHO) Capiz.
Ini ang ginpahayag ni Health Education and Promotion Officer Ayr Altavas sang mainterview sang Bombo Radyo.
Suno kay Altavas, base sa rekord sang Capiz Epidemiological Surveillance and Response Unit (CESRU) sang PHO, ang nasambit nga persona ang isa ka 43 anyos nga babaye kag 17 ka tuig na nga nagatrabaho bilang domestic helper sa Hongkong.
Nahibaluan nga sadtong Enero 19, 2020 nagpauli sa Capiz ang nasambit nga ginang para magbakasyon kag Enero 31, 2020 na ini nakabatyag sang pila ka mga sintomas sang nCoV kapareho sang ubo.
Bangud diri, nadesisyunan sang ginang nga magpakonsulta sa doktor sadtong Pebrero 3, 2020 kag gilayon man ini ginpanugyanan nga magpa-confine.
Sa karon nagapabilin nga naka-hospital quarantine ang amo nga persona sa isa ka pribado nga ospital sa siyudad sang Roxas.
Ginpadala naman sa Research Institute for Tropical Medicine (RITM) sa Alabang, Muntinlupa City ang specimen sample sini kag ila pa nga ginahulat ang laboratory results.
Nagpanawagan naman si Altavas sa publiko nga gilayon magpakig-angut sa mga local health officials kun may kakilala sila nga mga indibidwal nga may yara sang travel history sa China, Hongkong kag Macau.
Sa ulihi, nag-apelar man ini sa publiko nga magpabilin nga kalmado apang alerto bangud ginahimo sang mga local health officials ang tanan agud mapunggan kag matapna ang paglapta sang nasambit nga balatian.
