BOMBO ROXAS – Ginsaysay sang isa ka 33 anyos nga Capizeña Overseas Filipino Worker (OFW) sa isa ka facebook video nga naglawig sang 2 minutos ang kabudlay nga ginaagyan sini bilang isa ka Domestic Helper sa Jeddah, Saudi Arabia.
Suno kay Hernita Dela Cruz, iloy sang Capizeña OFW nga si Shirley Dela Cruz kag residente sang Barangay Libas, Roxas City nga masobra tatlo na ka bulan nga wala ginaswelduhan ang anak sini rason nga wala na makapadala sa pamilya ilabi na nga may yara ini sang tatlo ka mga kabataan.
Ginpahayag ni Hernita nga ginakaltas sa sweldo sang anak sini ang mga kagamitan nga ginaguba man sang kaugalingon sini nga employer sa tion nga nagawaras ini sa sulod sang balay.
Dugang pa sini nga ginhulog sang employer ang cellphone sang anak sini sa washing machine agud indi maka-kontak sa pamilya sini sa Pilipinas.
Maswerte naman nga nagamit pa sang Capizeña OFW ang daan sini nga cellphone rason nga ini ang gingamit niya agud makaubra sang pamaagi kun paano makapanawagan sang bulig sa mga kilala nga Filipino agud ireklamo ang employer sini.
Wala man nagalaum si Hernita nga ini ang maagyan sang anak bangud ini ang labing una nga pagpadulong sini sa nasambit nga pungsod.
Nagalaum ini sa karon nga mangin madasig ang pag-uba sang tikang sang OWWA matapos nagpadulong ini sa amo nga talatapan agud i-report ang natabo sa anak.
Mahibaluan nga nag-gradwar sang BS Education si Shirley apang nadesisyonan sini nga magpadulong sa nasambit nga pungsod sang tuig 2019 agud magtrabaho.
