ROXAS CITY – Yara na sa embahada sang Pilipinas sa Kuwait ang Capizeña OFW nga ginapatuman sang iya nga employer matapos gin-rescue sang isa man ka Capizeño kaina sang kaaganhon.
Sa exclusive interview sang Bombo Radyo Roxas kay Roger 
Depeña, nagatrabaho sa isa ka hotel sa Kuwait, ginpahayag sini nga nagkaisog ini nga i-rescue si Yolanda Villasis sang Barangay Agambulong, Jamindan, Capiz matapos natandog ang iya nga balatyagon sa panawagan ni Mrs. Leonila Besar, iloy sang Capizeña OFW sa Bombo Radyo nga nagapangayo sang bulig paramaluwas ang anak sini sa kamot sang iya nga employer.
Suno kay Depeña nga gilayon sini nga gin-add sa FB si Villasis tobtob nakaangkon sila sang komunikasyon kag ginplano ang pagpalagyo sini.
Nagrenta sang taxi si Depeña nga amo ang iya nga ginamit sa pagpadulong sa ginatrabahuan nga balay ni Villasis kag sang nag-abot sila sa nasambit nga address gilayon nga ini nga nagpanaug kaupod ang katrabaho sa balay nga gikan sa Davao City.
Aminado si Depeña nga wala untat ang iya nga pagpangamuyo samtang nagapadulong na sila sa Embahada sang Pilipinas sa Kuwait, bangud nahibaluan sini ang matabo sa iya pananglitan nga madakpan nga siya ang nagbulig agud makapalagyo ang duha ka OFW.
