ROXAS CITY – Dismayado ang isa ka Capizeña OFW nga naba-se sa Canada bangud sa kapaslawan sang tagdumalahan sang Lumina Homes sa banwa sang Ivisan nga mapatindugan na sang balay ang ila nabayaran nga unit.
Ginpahayag ni Zenith Villar nga nagalab-ot na sa P100,000 ang nabayad sini sa tagdumalahan sang nasambit nga kumpaniya nga nagpromesa patindugan na sang balay.
Apang tobtob sa karon, bisan haligi na gid lamang sang balay nga ila ginpromesa ang indi makita sa nasambit nga lugar.
Suno sa ginang nga nagkuha ini sang unit sa amo nga kumpaniya sang tuig 2017 kag sa sulod sang duha ka tuig nga pagbayad, sang nagligad lamang nga bulan ini nag-untat sa pagbayad matapos ginpaandaman sa iregularidad nga nagakahinabo sa Lumina Homes.
Ginkwestyunon naman sang tagreklamo ang management sang Lumina Homes, bangud kun maatrasar sila sa pagbayad sa ila amortization tagsa ka bulan, madasig sila sa pagsukot sang penalidad.
Sa karon ang luyag lamang matabo ni Villar amo nga mabalik sa iya sang management ang ginbayad nga kuwarta para sa nasambit nga unit.
