ROXAS CITY – Ginakabig sang isa ka Capizeña nga dream come true sa iya nga malibot ang tanan nga probinsiya sa Pilipinas.
Sa programa Good Morning Philippines, gintuad ni Gaycebel de los Santos sang Roxas City nga sa 81 ka mga probinsiya may yara ang Pilipinas, 66 na ka mga kaprobinsiyahanan ang iYa nabisitahan.
Ginalauman sang Capizeña traveler nga antes magtakup ang tuig 2020, malibot na sini ang nabilin nga mga lugar sa Pilipinas nga wala pa mapadulungan.
Nahibaluan nga indi lamang sa Pilipinas nagapanglugayawon si de los Santos, kundi mangin sa iban nga pungsod sa diin madamo na ini sang nangin mga abyan.
Ginpahayag sini nga nagsugod ini sa pagbiyahe sa nagkalain lain nga lugar sa Pilipinas sang tuig 2015 kag tagsa ka bulan may yara ini sang ginapadulungan nga lugar.
Apang nahibaluan gikan kay de los Santos nga indi lamang pagpanglugayawon ang ginahimo sini sa pagpadulong sa iban nga probinsiya, bangud kalakip man diri ang ginapatigayon nga charity works.
Aminado man ang Capizeña traveler nga sa 66 ka mga probinsiya sa Pilipinas nga nabisitahan, ang probinsiya sang Batanes ang makunsidera sini nga pinaka-espesyal.
Nakabisita man ini sa Marawi City sa diin personal sini nga nakita ang kahalitan nga natuga sang giyera.
Daku man ang nabulig sa iya mga biyahe ang mga promo rates nga gina-offer sang mga airline companies.
Samtang agud mabalanse man sini ang iya oras sa ila negosyo, trabaho kag biyahe, ginahatagan sini sang prayoridad ang dapat unahon kag ginasigurado nga indi magconflict ang schedule.
