ROXAS CITY – Na-rescue na ang Capizeña OFW nga ginamaltratar sang duha ka mga employers sa Kuwait.
Yara na sa kostodiya sang Philippine Embassy sa Kuwait si Jinky Gardose, tumandok sang banwa sang Tapaz, Capiz matapos ginbuligan sang iya nga agency nga Overseas Workers Employment Resources o POWER nga makahalin sa nalay sang amo
Sa video post sang Pinay worker, indi matapos tapos ang pagpasalamat sini sa mga nagbulig para ini ang makahalin sa balay sang mapintas nga employer.
Ginpalab-ot man sini sa iya nga pamilya sa Pilipinas nga luwas na ini kag karon yara na sa Philippine Embassy.
Sa interview sang Bombo Radyo kay Marivic Gardose, utod sang Pinay OFW, ginpahayag sini nga tuman ang ila nga pagpasalamat sa tanan nga nagbulig, bangud naluwas na sa pat-ud nga katalagman ang utod nga madugay na nga nagaantos sa mapintas nga amo.
Suno kay Marivic nga ginbaklan na sang bag-o nga maleta ang utod kag may yara na ini sang plane ticket.
Magapaidalum man sa medical examination ang biktima bangud indi lamang tampa, sumbag ang naaguman ni Jinky sa mapintas nga employers bangud nakaagi man ini nga ginbasyahan sang mainit nga tubig.
