ROXAS CITY – Ginpasalig ni Atty. Nelson Borja, Criminal Lawyer sa Metro Manila sa mga nabiktima sang illegal recruitment matapos matuntuhan ni Ramilyn Andrade sang Barangay Bolo, Roxas City kag live-in partner sini nga isa ka Korean national nga si Kim Tae Hyeong ang libre nga paghatag sang legal services sa ila.
Suno kay Atty. Nelson Borja, nga magapangayo ini sang bulig sa mga kilala niya nga abugado agud mapadasig ang pagpasaka sang panumbungon sa mga suspek kag gilayon nga mapasabat ang mga illegal recruiter.
Ginaganyat ni Borja ang mga biktima nga magpadulong sa Metro Manila bangud malapit didto ang tanan nga mahimo nila mapangayuan sang bulig kag mangin matalunsay ang pagpakig-angut sa mga natungdan nga ahensya.
Una nga mangin tikang ni Borja ang pagpakig-angut sa Philippine Overseas Employment Administration (POEA) agud hibaluon kun nakarehistro si Andrade bilang recruiter.
Masunod diri amo ang pagtsekyar sa Bureau of Immigration agud matumod kun sa diin sa karon ang Korean National.
Suno pa kay Borja nga magapakig-angut man ini Criminal Investigation and Detection Group (CIDG) kag National Bureau of Investigation (NBI).
Nagpaandam man si Borja sa nasambit nga mga illegal recruiters nga ibalik na ang kwarta sang mga biktima bangud ginasigurado sini nga magapangatubang ang mga ini sa patung-patong nga kaso sa ila ginhimo nga pagpanunto.
