ROXAS CITY – Bugal man sang probinsiya sang Capiz ang pagkalakip sang ambahanon nga ‘Break’ sa Top 12 finalists sang Bombo Music Festival 2020.
Ini matapos ginkompirmar ni Lindy Catequista sang Magsaysay Village, La Paz, Iloilo City nga co-composer sini ang music teacher gikan sa Cuartero National High School nga si Ramie Capuyan sang Barangay Maindang, Cuartero, Capiz.
Suno kay Catequista nga nahimo nila ang ambahanon kaupod man ang iya bana nga si Marty Catequista sa ila gintambungan nga workshop sa Iloilo City.
Ginpahayag ni Catequista nga ginhatagan sini sang ‘twist’ ang tinaga nga ‘break’ nga masami lamang ginaangut sa pagkabugras sang isa ka relasyon.
Mensahe suno sa iya sang ambahanon amo ang pagpahuway sa paggamit sang social media ilabi na sang mga pamatan-on sang subong nga henerasyon.
Mahibaluan nga ang Capizeño nga si Capuyan ang composer man sang school hymn sang Cuartero National High School kag theme songs sang Hinugyaw Festival sang ila banwa.
Sa subong pa lang hugot na nga preparasyon ang ginahimo ni Catequista kaupod ang iya mga co-composers kag nagalaom nga makuha ang kampeonato sa Bombo Music Festival 2020.
