ROXAS CITY – Isa ka ambahanon ang gin-compose sang isa ka Capizeño nga ginhalad sini sa mga frontliners.
Ginpahayag ni Gian Paul Falcis nga nagtulod kag nag-inspire sa iya para maghimo sang kanta amo ang founder sang Borres Youth Leadership Institute (BYLI) nga si Atty. Mark Borres nga nakita ang daku nga sakripisyo sang mga frontliners nga nagarisgo sang ila kabuhi agud indi maglapta ang coronavirus disease 2019.
Nadihon ang ambahanon nga may tigulo ‘’Laban lang Bangon Lang’’ agud mapakita ang importansiya sang pag-ugyon sang tanan agud mapakigbatuan ang makamamatay nga COVID-19.
Suno kay Falcis ang katahum sang mensahe nakuha sa realidad nga nagakahinabo sa kabuhi karon nga nagapangatubang sang health crisis ang pungsod.
Aminado ini nga may himata kag abyan nga mga frontliners nga nagserbe sini nga inspirasyon sa paghimo sang kanta.
Nahibaluan nga naga-eskwela pa lamang ini nagahimo na siya sang mga kanta tobtob nangin kabahin ini sang BYLI.
Gin-ako ni Falcis nga flattered kag malipayon siya sa madamo nga positibo nga feedback sa diin kasubong nagpabakud sa ila buot sa karon nga nagapangatubang sang pandemya ang kalibutan bangud sa coronavirus disease 2019.
